Zarauzko asteburu musikalenetarikoa amaitzear da. V. Adarretatik Musika Jaialdia ostiral iluntzen hasi zen Tremendo Surco DJ's-en, Birkiten eta Koko Jean & The Tonics taldearen doinuekin, eta gaur 13:00etan eta 20:00etan aterako dira oholtzara aurtengo azken bi taldeak.
Kontzertuek jendea erakarri dute –argazkietan ikus daitekeenez (antolatzaileen argazkiak dira)– eta horren lagungarri izan dira egun hauetan iluntze-gau partean kalean egin duen tenperatura atseginak.
Gaurko kontzertuei dagokienez, Juan de Diego Trio izango da aurrena, 13:00etan, malekoian Marina Txiki tabernaren terrazan. 20:00etan, berriz, Broken Brothers Brass Band + Broken Sisters taldea Munoako plazan ariko da. Doan dira kontzertu hauek, orain arteko guztiak bezala.