Beste uda batez, Los 40 Summer Live jaialdiak geldialdia egingo du Zarautzen. Uztailaren 29an izango da, eta Espainiako irratiformula ezagunak bere eszenatoki ibiltaria zabalduko du Dama pareko zabalgunean, hainbat artistari plaza emateko.
Irrati kateak dagoeneko iragarri du zein abeslari eta musikarik parte hartuko duten Zarauzko emanaldian. Abraham Mateo da ariko direnen artean entzute gehien duena nazioarte mailan, eta bere abestiak arrakasten zerrendan izan dira entzugai. Berekin batera, Walls, Leo Rizzi, Belén Aguilera, Lérica, Marc Seguí, Polo Nández, Depol eta Noran taldeak ere hartuko dute parte jaialdian.
Zeremonia-maisu lanetan, jaialdia girotzen eta artistak aurkezten Los 40 kateko disko jartzaile David Alvarez ariko da.