Elkarretaratzea egin dute eguerdian udaleko eta aldundiko ordezkariek nahiz hainbat herritarrek, asteburuan Zarautzen salatutako sexu erasoa irmoki gaitzesteko. Jesus Arana jarduneko alkateak azaldu duenez, protokoloa aktibatu eta bozeramaileen batzordean aho batez onartu zuten atzo publiko egin zuten adierazpen instituzionala. Udalaren izenean, elkartasuna erakutsi nahi izan diote biktimari, eta jakinarazi du eskura dituela udalaren zerbitzu guztiak. "Irmoki gaitzesten dugu gertatutakoa. Onartezina da pertsona baten giza eskubideak zanpatzea, eta ezin dugu onartu hori ez gizarte bezala, ez erakunde bezala", gaineratu du.
Miren Elgarresta Gipuzkoako Foru Aldundiko Berdintasunerako zuzendariak gogorarazi du duela hilabete eskas indarkeria matxistaren aurka egiteko konpromisoa hartu zutela lurraldeko udalerri askok, herriko jaietara begira. Erantzun publiko eta instituzionalarekin hiru helburu lortu nahi dituztela nabarmendu du: emakume biktimari babesa ematea, herritarrak sentsibilizatzea, eta erasoa gaitzestea.
Udaleko Parekidetasun zinegotzi Gloria Vazquezek gaineratu du indarkeria matxista gizartearen "arazo estrukturala" dela, eta zuzenean emakumeei eragiten diela. "Jarraituko dugu Parekidetasun departamendutik lanean lakra honekin bukatzeko", gaineratu du.