Nabarmen jaitsi da kasu positibo kopurua Urola Kosta eskualdean. Hala baieztatu du Eusko Jaurlaritzak koronabirusaren bilakaeraren berri emateko plazaratutako txostenak: duela astebete 1.180 kasu positiboren berri eman zuten; gaur, 688 izan direla jakinarazi dute. Intzidentzia tasek ere beheranzko joera hartu dute, baina aipatzekoa da COVID-19a detektatzeko Osakidetzaren protokolo aldaketak datu horietan izan dezakeen eragina. Izan ere, urtarrilaren 10ean Gotzone Sagardui Osasun sailburuak jakinarazi zuen botiketako testetan positibo ematen dutenei ez dietela beste probarik egingo, kontaktu estu zaurgarrien kasutan salbu. Beraz, intzidentziaren jaitsiera ez da kasu kopuruen jaitsieraren adierazle.
Zarautz izan da kasu positibo gehien zenbatu duten herria. Guztira, 208 kasu izan dira herrian, eta 5.152,70eko intzidentzia tasa dute. Azkoitian (5.574,56) eta Azpeitian (4.868,59) kasu kopuru antzekoa zenbatu dute, 116 eta 108, hurrenez hurren.
100 positibotik beherako langatik daude Orio 83 kasurekin (5.218,53), Zumaia 73rekin (4.813,27), Getaria 28rekin (5.795,05), Aia 19rekin (5.289,67) eta Errezil laurekin (3.864,73). Beizaman ez dute kasu bakar bat ere zenbatu, baina 4.032,26ko intzidentzia tasa dute.
Hego Euskal Herrian 2.816 positibo
Hego Euskal Herrian ere apaltzera egin dute datuek. Izan ere, 2.816 kasu positibo zenbatu zituzten atzokoan lau lurraldeetan; duela astebete 12.058 izan ziren. Erietxeetako datuek zertxobait hobera egin dute. Gaur gaurkoz, 718 paziente daude Osakidetzaren mendeko erietxeetan. ZIUetan, berriz, 122 pertsona daude, duela astebete baino hamalau gutxiago. Nafarroako Gobernuak emandako datuen arabera, lurralde horretan 276 pertsona daude erietxeetan, horietatik 37 ZIUetan.