-1-
Covid izurritea dela ta
txertoak sortu du kezka
Hartzea egokia ote da?
Zenbaitek dio galdezka
-2-
Beste hainbat arlotan bezala
ohikoa da zalantza
Arauak argitu behar luke
Baina askotan ez, antza
-3-
Aukera batzuk jarriko ditut
nik adibide bezala
Hitz dotorez hornitu ondoren
edukia da hutsala
-4-
Haurrak eskolaratze garaian
zehatza dute aukera
Arauak argi esaten dute
Beraz horren arabera
-5-
Haurrak hiru urtetikan seira
borondatez joaten dira
Eta ondoren derrigorrean
sei urtetik hamabira
-6-
Gizartearen ogibidea
betiro izan da lana
Baina sarritan desberdin dira
esana eta izana
-7-
Irmoki saiatuagaitikan
ez da erraza bidea
Lanpostu bat lortzea ez denez
inolaz eskubidea
-8-
Agintariek lan kontuetan
ez lagundu ez behartu
Baina lanean hasi ezkero
zergaren karga bai sartu
-9-
Kalean oinutsik ibiltzea
ez dago galerazita
Oso arriskutsua izanik
ondo pentsatzen jarrita
-10-
Gorputzeko hainbat atal berriz
ezin dira erakutsi
Salaketa jaso dezakezu
bere isun eta guzi
-11-
Adibideak alboratuaz
Itzul gaitezen txertora
Dena argi ez eduki arren
ardura beharrezko da
-12-
Seigarren olatua heldu da
kutsatuaz ingurua
Kaltetuak biderkatu dira
zapuztuz gure helburua
-13-
Txertatu gabeen kutsatzea
gailendu da areago
Txerto hartzeak duda sortzen du
ta ez hartzeak gehiago
-14-
Arazoa oso larria da
beraz behar da ebatzi
Txertoa herritar guztieri
nahitaez hartuarazi