Zarauzko Udaleko Turismo, Jai eta Ekitaldien Departamentuak, Zurekin ostalarien elkartearekin lankidetzan, Instagram bidez parte hartzeko Udazken koloreak Zarautzen argazki lehiaketa antolatu du. Landu beharreko gaia lehiaketako izenburuko bera da, eta erabiltzaileek herriko kale, plaza eta txoko gustukoenei buruzko irudiak partekatu beharko dituzte, #udazkenkoloreakzarautzen traola gehituta argazkien oinean edo lehen iruzkinean.
Era berean, @zarautzturismo eta @zurekinelkartea profilen jarraitzaile izan beharko dute parte hartzaileek, eta gehienez 3 argazki aurkeztu ahalko dituzte epe barruan. Lehiaketa urriaren 1ean jarriko da indarrean, eta azaroaren 7ra arte iraungo du. 18 urtetik gorako eta sare horren baldintzak errespetatzen dituzten Instagram aplikazio mugikorraren erabiltzaile guztiek parte hartu ahal izango dute. Lehiakidearen profilak publikoa izan behar du betiere.
Turismo Saileko eta Zurekineko ordezkariek aukeratuko dituzte argazki irabazleak, eta balorazioa egiterakoan kontua hartuko dituzte kalitatea, sormena, originaltasuna eta proposatutako gaiarekin duen lotura-maila. Erabakia azaroaren 12an partekatuko dute sare sozialetan. Bi sari banatuko dituzte: lehena 150 euroko izango da, Turismo Departamentuak emango duena, eta bigarrena, Zurekin sari berezia, Zurekin Zarauzko Ostalarien Elkarteko ostatuetako batean gau bat bi pertsonentzat.