Atzo egindako PCR eta antigeno probetan bederatzi kasu positibo detektatu dituzte Zarautzen. Azken egunetan, beraz, gora egin du herrian baieztatutako kasuen kopuruak: hiruna izan ziren aurreko igandeko eta astelehen honetako probetan, sei asteartekoetan eta bederatzi atzokoetan. 100.000 biztanleko hamalau eguneko tasa gorantz doa, apurka-apurka: 102,8koa zen asteartean, 115,65ekoa atzo eta 149,91koa gaur.
Asteak aurrera egin ahala, gora egin dute positibo berriek eskualdean. Positibo bakar batzuk soilik atzeman zituzten astearen hasieran Urola Kostan, baina atzo hemezortzi kasu berri zenbatu zituzten guztira, Eusko Jaurlaritzako Osasun Sailak emandako datuen arabera. Herenegun bezala, eskualdeko herrien artean, Zarautzen atzeman dituzte kasu gehien atzoko probetan; hain zuzen, positibo guztien erdia.
Zarautzen bezala, Azpeitian ere gora egin du kutsatu kopuruak, eta atzo zazpi kasu berri hauteman zituztela adierazi du Osakidetzak. Hala, intzidentzia tasa 203,68koa da.
Eskualdean zenbatutako beste bi kasuak Aian eta Azkoitian atzeman dituzte. Aiaren kasuan, azken astean detektatutako bigarren kasua da atzokoa –astelehenean hauteman zuten bestea–; ehunekoa da intzidentzia tasa herri horretan. Azkoitian ere kasu bakarra atzeman dute, eta asteburuan zenbatu zituzten beste bi kasurekin, astebetean herri horretan izan duten hirugarrena da, baina egoera epidemiologikoa ona da Azkoitian, bost mila biztanletik gorako herrien artean eskualdeko intzidentzia tasarik txikiena baitu, 66,76koa, hain zuzen ere.
Positibotasun tasa txikia
Atzokoan 9.560 proba diagnostiko egin zituzten Osakidetzak eta Osasunbideak, eta denera 414 positibo atzeman zituzten. Horietako 201 Bizkaian zenbatu zituzten, 58 Araban, 106 Gipuzkoan eta 47 Nafarroan. Lurralde horietatik kanpo bizi diren beste lau lagunek ere eman zuten positibo. Gaur gaurkoz, %4,3koa da positibotasun tasa Araban, Bizkaian eta Gipuzkoan, eta %4,32koa Nafarroan.
Ospitaleetako egoera hobetzen ari da apurka-apurka, apaltzen ari delako koronabirusak erietxeetan duen eragina ere. Atzo 31 ospitaleratze berri egon ziren Araba, Bizkaia eta Gipuzkoako erietxeetan, eta denera 228 lagun daude ospitaleratuta koronabirusagatik hiru lurralde horietan; Zainketa Intentsiboen Unitateari dagokionez, 100 pertsona daude bertan, atzo baino bost gutxiago. Nafarroan, aldiz, lau lagun ospitaleratu zituzten atzo COVID-19a dela dela.