Eusko Jaurlaritzako Osasun Sailak kaleratu berri du atzo, asteazkena, egindako PCR eta antigeno probetan zenbat kasu positibo atzeman zituen. Urola Kosta eskualdean beste 50 kasu berri baieztatu zituzten; horietako 11 Zarautzen. Intzidentzia tasak Gipuzkoako baxuenetarikoa izaten jarraitzen du herrian, baina atzo atzemandako positiboak azken egunetakoak baino nabarmen gehiago izan dira. Ondorioz, intzidentzia tasa ere igo egin da apur bat: 201,31ekoa da gaur, eta atzo 200en azpitik zegoen.
Eskualdeari begira jarrita, hirugarren olatuaren eragina handitzen doa egunez egun. Azpeitian baieztatu zituzten atzo ere kasu gehien, izan ere hemezortzi positibo baieztatu zituzten. Bihar, ostirala, itxiko dute Azpeitia, intzidentzia tasak 500eko langa gainditu zuelako atzo, urtarrilak 20. Gaur, gainera, gora egin du tasa horrek, eta 650,46an kokatu da. Horrenbestez, herriko sarrera-irteerak eta ostalaritza ixteko aginduko du Eusko Jaurlaritzak, eta taldeko kirola ere debekatuko du. Neurri horiek bihar bertan sartuko dira indarrean, eta gutxienez datorren ostiralera arte egongo dira egoera horretan.
Nabarmendu behar den beste herria Zestoa da. Izan ere, lau kasu berri atzemanda 539,29ko intzidentzia tasara ailegatu da, eta Azpeitian bezala han ere ez da bihartik aurrera gogortuko ditu neurriak Jaurlaritzak. Mugitzeko askatasuna mugatzeaz gain, ostalaritza guneak eta taldean kirola egitea galaraziko dituzte.
Dagoeneko itxita dauden herrien artean daude Orio, Zumaia eta Aizarnazabal. Orion, beste bost kasu atzeman dituzte, eta eremu gorrian jarraituko dute han; 717,55ekoa da intzidentzia tasa. Modu berean daude Zumaian ere; han lau kasu positibo berri hauteman zituzten atzo egindako probetan, eta 773,38an da tasa. Aizarnazabalen, berriz, hiru kasu berri zenbatu zituztern, eta eskualdeko tasarik handiena duen herria izaten jarraitzen du 4.551,37ko tasarekin. Azkoitiak azken lau egunetan ez du lau kasu positiboko langa gainditu, eta eremu laranjan jarraituko du, 367,19ko tasarekin. Aian, aldiz, bi kasu atzeman dituzte, eta intzidentzia tasa 554,16koa da; halere, Eusko Jaurlaritzak kaleratu duen ebazpenean ez du Aia sartu itxiko diren herrien zerrendan. Izan ere, Jaurlaritzak osasun eremuen egoera hartzen du kontuan, besteak beste, 5.000 biztanletik beherako herriak ixterako orduan, eta 314,82koa da Zarautz, Orio eta Aiako osasun eremuaren tasa. Zumaia, Zestoa eta Getaria arteko osasun eremuko tasa, berriz, 772,07koa da. Beizaman, Errezilen eta Getarian ez dute kasu positiborik hauteman.
Kasuak areagotzen
Hego Euskal Herrian, bestalde, 1.340 kasu positibo atzeman zituzten. Araban, Bizkaian eta Gipuzkoan 13.664 PCR eta antigeno test egin zituen Osasun Sailak atzo, eta 1.115 kasu detektatu zituen. Osasunbideak, aldiz, 3.081 proba egin zituen Nafarroan, eta 225 kasu positibo atzeman zituen. Lurraldeen arabera, egoerarik okerrena Bizkaian dute. 622 kasu zenbatu zituzten han, 299 Gipuzkoan eta 176 Araban. Halere, hiru lurralde horietatik kanpo bizi diren beste hemezortzi kasu ere baieztatu dituzte.
Osasun erakundeek ez dute argitu oraingoz hiru lurralde horietan zenbat pertsona dauden ospitaleratuta; hala eta guztiz ere, Osakidetzak adierazi du zainketa berezia behar duten 101 pertsona daudela Araban, Bizkaian eta Gipuzkoan, eta horiek ZIUan ospitaleratuta daude. Nafarroan positibotasun tasa %7,3an kokatu da, eta Araban, Bizkaian eta Gipuzkoan %8,2an. Azken hiru lurralde horietan, gainera, R0 indizea 1,18koa da.