Eusko Jaurlaritzako Osasun Sailak kaleratu berri dituen datuen arabera, asteburuan sei positibo izan dira Zarautzen —ostiralean eta larunbatean bana eta atzo lau—. Gaur-gaurkoz, beraz, 239,86koa da intzidentzia tasa, eta behera egin du kopuruak azkeneko hiru egunetako datuak kontuan hartuta —244,24koa zen ostiralean—. Hala ere, eremu horia izaten jarraitzen du Zarautzek.
Eskualdeari erreparatuz gero, baina, hirugarren olatuaren eragina iristen ari dela dirudi. Ostiralaz geroztik 73 positibo zenbatu dituzte Urola Kostan, joan den asteburuan baino bat gutxiago, eta zenbait herritako egoerak okerrera egin du. Zumaiarekin eta Aizarnazabalekin batera, Orio ere eremu gorrira sartu da, eta bihartik aurrera herriko sarrera-irteerak eta ostalaritza sektorea itxita eta eskola kirola egitea debekatuta izango dituzte han ere. Orion hamar positibo baieztatu dituzte ostiralaz geroztik —hiru ostiralean, bost larunbatean eta bi igandean— eta 554,57koa da 100.000 biztanleko hamalau eguneko intzidentzia tasa.
Dena dela, Azpeitia da asteburuan positiborik gehien atzeman dituzten eskualdeko herrian, 25 hain zuzen —zazpi ostiralean, hamabi larunbatean eta sei atzo—. Ondorioz, intzidentzia tasak igoera nabarmena izan du, 274,45koa zen ostiralean eta 413,93koa zen atzo, eta beste behin ere eremu laranjara igaro da.
Zumaian, beste hamabi positiborekin —ostiralean lau, larunbatean hiru eta atz bost—, oso kezkagarria izaten jarraitzen du egoerak. Ostiraleko intzidentzia tasa bera dute, 926,02koa, eta horrenbestez, herriko sarrera-irteerek eta ostalaritza sektoreak itxita jarraituko dute eta gaztetxoek ezingo dute eskola kirolik egin.
Aizarnazabalen ere eremu gorriko mugekin jarraituko dute datozen egunetan, baina egoerak baretzera egin duela ematen du. Intzidentzia tasak oso altua izaten jarraitzen du, 6.111,83koa, baina asteburu guztian positibo bakarra atzeman dute.
Azkoitian zortzi positibo baieztatu dituzte azken hiru egunotan —ostiralean bi, larunbatean lau eta atzo bi—, eta 358,84koa da intzidentzia tasa; Zestoan, aldiz, zazpi positibo izan dira —ostiralean bost eta larunbatean bi— eta 231,12koa da tasa. Aian eta Getarian bina positibo zenbatu dituzte asteburuan, eta bat bera ere ez Beizaman eta Errezilen.
Hego Euskal Herrian, milako mugaren azpitik
Eusko Jaurlaritzak eta Nafarroako Gobernuak emandako datuen arabera, beste 847 kasu positibo atzeman dituzte Hego Euskal Herrian. Bigarren egunez jarraian, eguneko positiboen kopurua 900 kasutik beherakoa da Hegoaldean, baina aipatzekoa da egun bakoitzean egindako test kopuruak asteburuan izandako beherakada. Izan ere, egun bakarrean zenbatutako positiboen kopuruak milakoa gainditu zuen joan den ostegunean (1.030), baina ia 5.000 test gehiago egin ziren egun hartan. Atzo 9.621 proba egin zituzten Osasunbideak eta Osakidetzak, eta horien %8,8k eman dute positibo. Gainera, positiboen ehunekoa nabarmen handiagoa da Nafarroan: %11,7.
Lurraldeka, Bizkaian atzeman dituzte kasu gehien, beste behin. Zehazki, Osakidetzak 358 positibo detektatu ditu lurralde horretan. Bizkaiak Nafarroa du atzetik; 199 kasu izan dira foru erkidegoan. Gipuzkoan 187 zenbatu dituzte, eta Araban 90.
Eusko Jaurlaritzako Osasun Sailak jakinarazi zuenez, atzo 40 pertsona eraman zituzten erietxera Araban, Gipuzkoan eta Bizkaian. 507 lagun daude Osakidetzaren ardurapeko ospitaleetan erietxeraturik. Horietan, 98 lagun daude ZIU zainketa intentsiboetako unitateetan; azken lau asteetan erregistratutako daturik txarrena da.
Nafarroako Osasun Departamentuak oraindik ez du eman ospitaleen gaineko informaziorik.