Zarauztik Zumaiara zihoan trenak istripua izan du gaur goizean, 10:00ak baino lehen: Oikia ingurura iritsi denean, zuhaitz bat erori eta trenaren katenaria jo du, matxura eraginez.
ZARAUZKO HITZAk jakin duenez, ez ziren bidaiari asko barruan, eta oinez mugitu behar izan dira Oikiara. Taxia hartu dute handik, Zumaiara.
Euskotrenek ZARAUZKO HITZAri jakinarazi dio une honetan itxita dagoela Zarautz eta Zumaia lotzen dituen trenbidea. Hortaz, autobus zerbitzua jarri du martxan bi herri horien artean: Donostiatik Bilbora bidean doazen bidaiariek Zarautzen jaitsi behar dute, eta autobusez joango dira Zumaiara. Zumaian berriz igo ahal izango dira trenera, Bilborako norabidean, baina hainbaten kasuan, helmugaren arabera, haraino eramango dituzte autobusean.
Alderantziz, Bilbotik Donostiara bidean doazen bidaiariek ere berdina egin beharko dute Zumaiara iristean: trenetik jaitsi eta Zarautzera mugitzeko autobusa hartuko dute han. Zarautzera iristean, trenera igo ahal izango dira berriz, Donostiarako norabidean.