COVID-19ak eragindako egoera dela eta, abuztuaren erdialdean ospatu ohi den Aste Nagusiko ekitaldiak bertan behera uztea erabaki zuen Zarauzko Udalak, beste hainbat neurriren artean. Udalak jakitera eman duenez, "pilaketak eta arrisku egoerak saihesteko", aurten ez da izango kontzerturik, berbenarik, su artifizialik, erraldoirik eta buruhandirik.
Hilaren 14ko Salbe tradizionalaz eta Ama Birjinaren omenezko Meza Nagusiaz gain, profesionalen arteko pilota partidak jokatuko dira asteburuan Aritzbatalde pilotalekuan, baita traineru estropadak ere: Zarauzko XLII. Ikurrina gizonezkoetan eta Zarauzko XII. Ikurrina emakumezkoetan.
Zarauztarrei higiene neurriak areagotzeko eta urruntze sozialari eusteko gogorarazi die udalak, baita maskara erabiltzea derrigorra dela ere.