Eskualdeko herrietan hamalau koronabirus kasu berri detektatu dituzte ostiralean, larunbatean eta igandean; horietako bi, Zarautzen. Osakidetzak gaur plazaratu du asteburuko datuak azaltzen dituen txostena, eta ostiralean, larunbatean eta igandean eskualdeko kutsatutakoen ondoko zenbakiak jaso dituzte bertan: Getarian lau, Azpeitian hiru, Azkoitian, Zarautzen eta Zumaian bina eta Zestoan bat. Zarautzen atzemandako bi kasuak ostiralekoak dira, eta, larunbatean eta igandean ez zen positibo berririk atzeman herrian, kasuak berragertzen hasi zirenetik lehen aldiz.
Araban, Bizkaian eta Gipuzkoan 1.085 kasu berri zenbatu dituzte ostiralean, larunbatean eta igandean, eta 16.913 PCR proba egin dituzte guztira. Positibo berri horietatik 168 Araban topatu dituzte, 713 Bizkaian eta 177 Gipuzkoan. Gainontzeko 27ak lurralde horietatik kanpo bizi diren pertsonak dira.