Hiru kasu berri atzeman dituzte

Koronabirus kasu berriak hautematen jarraitzen dute Urola Kosta eskualdean. Baina atzo, Eusko Jaurlaritzako Osasun Sailak emandako datuen arabera, herenegun baino kasu positibo berri gutxiago atzeman dituzte: lau kasu. Horietatik hiru kasu Zarautzen diagnostikatu dituzte, eta bat Azkoitian. Eskualdeko beste herrietako positiboen kopuruek berdin jarraitzen dute. Hala, honako hauek dira, herriz herri, kontaketak hasi zirenetik positibo eman dutenen kopuruak: 105 Zarautzen, 45 Zumaian, hamabost Orion, hamabi Azkoitian, zortzi Azpeitian, lau Zestoan, hiru Aian eta Getarian, eta bi Aizarnazabalen. Beizaman eta Errezilen, oraingoz, ez dute kasurik atzeman.

Dena dela, koronabirusaren krisia hasi zenetik positibo eman dutenetako hainbat sendatu dira dagoeneko, eta beste batzuk hil ere egin dira eskualdean. Beraz, ezin da jakin zehazki egun zenbat pertsona dauden gaixorik. 

Datuak lurraldeka

Araban, Bizkaian eta Gipuzkoan, 11.226 koronabirus kasu zenbatu ditu Osakidetzak, herenegun baino 208 gehiago. 1.367 test egin dituzte hiru lurralde horietan azken 24 orduetan, eta horietatik %15ek eman dute positibo. Eusko Jaurlaritzak azpimarratu du portzentaia hori orain arteko baxuena izan dela. Nafarroan, berriz, 4.150 dira gaur arte COVID-19 gaitzarekin kutsatutakoak. Hego Euskal Herrian, guztira, 1.108 dira koronabirusarekin hildakoak. Hildako berrien kopurua azken egunetakoa baino baxuagoa bada ere, “datu lazgarria” izateari ez diola uzten nabarmendu du Eusko Jaurlaritzak. Gaitza gainditu duten pertsonak ere badaude, noski. Guztira, 5.923 pertsonek senda agiria jaso dute Osakidetzak eta Nafarroako Osasun Sailak emandako datuak kontuan hartuta.