Eusko Jaurlaritzako Osasun Sailak ohar bat argitaratu du, sektoreko gainontzeko eragileekin batera, sendagaien banaketari buruz hartu dituen neurriak azaltzeko. Neurri horiek bi helburu nagusi dituzte: batetik, bermatzea jendeak eskura izango dituela behar dituen botikak, farmazietara ahalik eta gutxien joanda; eta, bestetik, jende-pilaketa saihestea farmazietan eta osasun-zentroetan, osasun-profesionalak babesteko.
Alde batetik, botiken bidezko tratamenduak hiru hilabete gehiagoz luzatuko dira. Gainera, botikak bi hilabeterako emango zaizkie pazienteei, ez orain arte bezala, hilabete baterako.
Bestetik, arrisku taldeetako herritarrei botikak etxera eramateko zerbitzua antolatzen ari da Osasun Saila, sektoreko gainontzeko eragileekin batera. Zerbitzu horren barruan arrisku handieneko pertsonei etxera deituko diete, botikak noiz eta non entregatu zehazteko. Horrez gain, premia larriko kasuetan, 012 telefonora deitu dezakete herritarrek, medikazio-premiarekin lotutako eskaerak egiteko. Zerbitzuak lehentasuna emango die menpekotasun-egoeran dauden eta Beti On telelaguntza-sistemaren bidez artatzen diren patologia anitzeko pertsonei.
Informazio osatua Osasun Sailaren webgunean eskuratu daiteke.