-1-
Herrixka batean kokatu zen
Ez dut gogoan izena
Baina bitxia bene benetan
barnean gertatzen zena
Hainbat herritarrek harremana
zuten aspaldi etena
Diru zorraren ondorioa
zenez arrazoi zuzena
-2-
Eguraldia ona zegoen
udako egun batean
gizon dirudun bat agertu zen
ostatuaren atean
ta nagusiak adeitsu, ongi
etorria ematean
Berak logela behar zuela
Hurrengo hilabetean
-3-
Bostehun euroko biletea
jarriaz erakusmahaian
ostalariari esan zion
gauzak argi jarri nahian
Gelak ikusi nahi zituela
egiaztapen lasaian
Diru kontuak argitzekotan
gerora bere garaian
-4-
Bostehun euro eskuan eta
ostalaria pozikan
Laisterka batez abiatu zen
aldapan behera karrikan
harakinari lehendikan zuen
zorra kitatu nahirikan
Eta horrela konpondu zuten
xextra behingoagatikan
-5-
Harakin horrek zorrak zituen
Arin joan zen hiltegira
Eta bertako arduradunak
harriturikan begira
eskertu zion hala irria
itzuliaz aurpegira
Ta billeteak osatu zuen
hala bigarrengo bira
-6-
Hiltegikoak ere bazuen
kopuru hortako zorra
Iturginakin hai zuzen ere
Zein egoera gogorra!!
Ta beregana joan zenean
Zuretzat dirua,horra!!
Lehen esanak ahaztu zituen
Hauxe da jende jatorra!!!
-7-
Iturginakin gertatzen zena
Argi ta garbi esanda
Emagalduen bisitaria
gustuko zuen parranda
Haiekin zorra orain zuenez
ordaintze hitza emanda
Emakumeen esku eginaz
billeteak hurren txanda
-8-
Emagalduek ostalaria
zuten baretu beharra
Berakin zorra berdina zuten
aspalditik,nahiko zaharra
Horra dirua erakusmahaian!!!
Ostalarian zirrara
Bostehunekoak amaitu zuen
herrixkan txango azkarra
-9-
Bezero gaiak geletan zehar
egin da sar-irteera
erakusmahaira bideratu zen
zakar samarra jarrera
Bere gustukorikan ez zela
ostatu hartan,bai zera!!!
Horregaitikan eskatu zuen
billetean itzulera
-10-
Horrela bada bidaiaria
abiatuz berehala
Herrixka hartan beste giro bat
nagusitu zen,aibala!!!
Zorrak kitatu eta gainera
harremana txit normala
Zalantzik gabe bisita hura
suertatu zen mundiala