Azken orduetako zurrumurruak baieztatu egin dira eta Espainiako Gobernuak hilaren 26a arte luzatuko du koronabirusa dela-eta ezarritako alarma egoeraren barruko herritarren konfinamendua.
Gaur goizean zientifikoen aholku batzordearekin bilera egin ostean hartu dute erabakia. Pedro Sanchez Espainiako Gobernuaren presidenteak 15:00etan egin du agerraldia, eta azpimarratu du kutsatzeak murriztea dela garrantzitsua eta horretarako denbora behar dela.
Agerraldian aurreratu du aktibitatera pixkanaka itzuliko dela gizartea, eta plan bat prestatzen ari direla gaineratu du alarma egoera eta mugikortasunak izango dituen bilakaeraz. Hori bai, esan du industria berriz martxan jarriko dutela Aste Santuen ondoren.
Martxoaren 14an ezarri zuten alarma egoera hori eta, berarekin, konfinamendua. Orduan, hamabost egunerako ezarri zuten, martxoaren 29a arte. Lehen astea igarota, ordea, martxoaren 22an, jakin zen apirilaren 11 arte luzatuko zutela itxialdia. Gaurko erabakiarekin, beste bi aste erantsi dizkiote.
Umeak etxetik irteteko edo kirola egiteko aukerarik ez du aipatu Sanchezek, ezta maskaren erabileraren gaineko neurririk ere. Momentuz, konfinamenduaren baldintzetan berrikuntzarik ez du iragarri.