Orain urtebete zabaldu zuen Zarauzko Udalak Modelo zinema areto eraberritua, eta bihartik aurrera zerbitzua hainbat hobekuntzarekin eskainiko dute. Udalak lehiaketa publikora atera zuen kudeaketa, eta jakinarazi du Goikus Kudeaketa S.L. enpresa arduratuko dela aurrerantzean zerbitzua eskaintzeaz.
Bihartik aurrera hainbat hobekuntzaz gozatu ahalko dute herritarrek: batetik, Internetez erosi ahalko dira zinemarako sarrerak. Horretarako udalaren zarautz.eus atarian sartu behar da, eta Agenda atalean ikusi nahi den filmaren gainean klikatu behar da. Han, aukera egongo da sarrera erosteko. Hala azaldu du prentsa ohar bidez Irune Urbieta Kultura eta Euskara zinegotziak. "Berrikuntza honekin denbora asko aurreztuko du jendeak. Nahi duenak, sarrerak bere etxetik erosteko aukera izango du, txarteldegian ilararik egin gabe", gaineratu du Kultura zinegotziak.
Sarrerak online erosi ondoren, ez da Kutxako terminal batera joan beharrik sarrera horiek inprimatzeko. Prozesua ondorengoa da: sarrera erosi ostean, posta elektroniko bat iristen da sakelako telefonora lokalizadore batekin. Zinemara sartu aurretik, Modeloko leihatilatik pasatu behar da eta bertan inprimatu egiten diren sarrerak. Laster, Modelo Aretoko sarreran QR kode irakurgailu bat jarriko da eta zuzenean mugikorrera iritsiko den QR kode horrekin edo etxean sarrerak inprimatu ondoren, zinemara sartzeko aukera egongo da.
Sarrerak zenbakidunak
Gainera, saio batzuetan sarrerak zenbakidunak izango dira, eta karteldegian jakinaraziko dute hori. Urbietak zehaztu duenez, larunbat eta igandeetako 19:30eko saioak eta astelehenetako bi saioak izango dira zenbakidunak. Umeen saio guztietan ere sarrerak zenbakidunak izango dira.
Sarrerak leihatilan erosteaz, filma hasi baino 30 minutu lehenago jarriko dira salgai, sarrerak zenbakirik gabeak direnean. Zenbakidunak direnean, berriz, 45 minutu lehenago. Saioa hasi eta 15 minutura itxiko da leihatila.
Bestetik, hilabete osoko zinema programazioa egongo da herritarren eskura, ikusleek aurrez jakin dezaten zer film emango dira hurrengo asteetan. Hori aspaldiko eskakizuna zela azpimarratu du Urbietak.
Filmak 3Dn eta bertsio originalean ikusgai
Horrez gain, hemendik aurrera 3Dn ekoitzitako filmak ikusteko aukera ere egongo da Modelon. Goikus Kudeaketa arduratu da arlo teknikoaz, eta filmak ikusteko betaurrekoak ere aretoan bertan izango dituzte herritarrek.
Asteburu honetan bertan emango dute 3Dko aurreneko filma: La familia Adams haurrentzako pelikula. Larunbatean eta igandean, 17:00etan egongo da ikusgai.
Bertsio originaleko filmei dagokienez, aurrenekoa otsailean emango dute: Parasitos. Dena den, ez dute jakinarazi zein egun eta ordutan egongo den ikusgai lan hori.
Prezioak garestituta
Berrikuntzez gain, sarreren prezioa ere eguneratu egin dute; euro erdi garestitu dituzte sarrerak orokorrean. Hauek dira prezio berriak: sarrera arrunta 5,50 euro; ikusleen eguneko sarrera 4,50 euro; saio originala 4,90 euro; haur saioa 4,20 euro, haur estreinaldia 5,30 euro, haur saioa 3D 5 euro, haur estreinaldia 3D 6,20 euro; eta helduen saioa 3D 6,50 euro.