Datorren astelehena, otsailak 4, Minbiziaren Kontrako Nazioarteko Eguna da. Horri lotuta, Gipuzkoako AECC minbiziaren kontrako elkartearen Urola Kostako ordezkaritzak hainbat ekintza antolatu ditu Zarautzen egun horretarako. Besteak beste, astelehenean, 10:30etik aurrera, Kale Nagusian (Merkatu plazaren aurrean) informazio mahaia jarriko dute elkarteko boluntarioek, profesionalek lagunduta. Bertan, minbizia duten pertsonen errealitatea erakusteko materiala banatuko dute. Era berean, AECCk eskaintzen duen doako psikologia terapia zerbitzuaren berri emango dute. Aurten, gaixotasunak alderdi emozionalean eragindako ondorioetan jarriko dute arreta.
Gainera, Zarauzko hainbat merkatarik bat egingo dute AECCren kanpainarekin eta erakusleihoak elkartearen sinboloarekin apainduko dituzte.