Urtarrilaren 5ean hil zen Palmiro Haro Alares eskultorea, Azpeitiako egoitza batean. Zarauzko kaleetan ikus daitezke Haroren eskulturetatik hiru: Eskudero maisuari omenaldia, Basarriri omenaldia eta Aita Epelderen bustoa.
Haurra zela Zarautzera bizitzera etorri zen Haro bere familiarekin. Bertan, 13 urte zituenez geroztik aitarekin egur-tailan jardun zuen lanean, eta Zarauzko Lanbide Eskolan marrazketa ikasi zuen. Soldadutza egin ostean, Parisera joan, eta tallista lanetan jardun zen. Bere tailer txikia ere zabaldu zuen Parisen, eta hala, apurka-apurka eskultura lanak egiten hasi zen.
Suedian lanean bolada bat egin ostean, Parisera itzuli zen, eta Parisko Operan hasi zen lanean, hango eskultura-tailerreko buru. Hamazazpi urteren buruan, Parisko Opera utzi eta Zarautzera itzuli zen. Hementxe bizi izan da oraintsu arte. Azken urteak egoitza batean eman ditu, Alzheimer gaitzak erasanda.