Hainbat saioren ostean, bukatzera doa aurtengo eskolarteko bertso txapelketa. Larunbatean Saran jokatuko dute Euskal Herriko Eskolarteko Bertsolari Txapelketa, eta zarauztar bat sailkatu da 30. edizioko finalerako: Aner Peritz Manterola Euzkitze.
Peritz bigarren gelditu zen Gipuzkoako txapelketan, Oihana Aranaren ondoren, eta biek ordezkatuko dute lurralde hori finalean. Horiekin batera, beste 11 bertsolari gazte ariko dira bat-bateko saioan: Aitor Ugarte eta Aroa Arrizubieta arabarrak; Elixabet Etxandi eta Julen Etxeberri baxenafarrak; Gorka Pagonabarraga eta Iruri Aitzerreka bizkaitarrak; Hodei Renteria eta Irati Alcantarilla lapurtarrak; Xabat Illarregi eta Ekiñe Zapiain nafarrak; eta Haritz Capot zuberoarra.
Egun osoko festa
Finala 11:00etan hasiko da, Sarako trinketean. Bi atal izango ditu saioak. Hasierako agurraren ondotik, binaka aritko dira zortziko handian eta txikian; eta gero, puntuazio altuena lortzen duten sei bertsolariek bakarkako ariketak egingo dituzte.
Aurten 30. urteurrena denez, Mikel Mendizabalek jantziko dio txapela irabazleari.
Txapelketaren ondoren, bazkaria egingo dute Lur Berri gelan, 14:00etan. Ondoren, Saran'ga txarangak alaituko du bazkalostea.