Ikasturte honetan 90 pertsona inguru aritu dira Mintzalagun Programan, astean behin euskara praktikatzeko elkartuz. Udan ere izango da mintzapraktiketan izena emateko aukera, eta izena eman nahi duenak, ekainaren 20a arte izango du aukera. 0
Mintzalagun Programak 5-6 laguneko taldeak osatzen ditu adin, eskuragarritasun eta zaletasunen arabera. Taldekideak astean behin elkartzen dira beraiek aukeratutako tokian, ordubetez, elkarren artean euskaraz jarduteko. Euskaldun berriek zein zaharrek eman dezakete izena, bakoitzak dagokion ekarpena eginez.
Argibideak jasotzeko edo izena emateko hainbat bide daude: telefonoz, 625 48 52 15 zenbakira deituta, posta elektronikoz, urolakosta@aek.org helbidera mezu bat bidalita, www.mintzalagun.blogspot.com webgunean, Mintzalagunak Gara facebook orriaren bidez edo Zarauzko Udal Euskaltegira joanda.
Ikasturte amaierako ekitaldia
Proiektua osatzeko, ikasturte hasieran eta amaieran ekitaldi bana egiten dute, eta aurtengo ikasturte amaierako ekitaldia ekainaren 7an izango da, Zarautzen. Antoniano aretoan elkartuko dira ikasturtean zehar mintzapraktiketan ibili diren kideak 18:30ean, eta bertan, Andoni Egaña bertsolaria jardungo da hizlari lanetan.