Arkaitz Yurritaren eta Javier Valeroren Al otro lado de la cuerda dokumentala izango da ikusgai bihar (maiatzak 3) Antoniano aretoan, 20:00etatik aurrera. Irudi bikainez lagunduta, Pirinioetako horma garrantzitsuenak eta eskalada bide sortzaile iraultzaileenak ezagutzeko aukera eskaintzen du ikus-entzunezkoak.
Datorren astean, maiatzaren 10ean, Iker Madozek Eskalatzen... nora eta norekin hitzaldia emango du. Txiki Polit jatetxean izango da, 20:00etan. Hurrengo bi asteetan, maiatzaren 16an eta 24an, 2017ko Bilbao Mendi Film Festival jaialdiko ikus-entzunezko onenak botako dituzte; Antoniano aretoan izango dira emanaldiak, 20:00etan hasita, eta sarrerak 3 euro balioko du egun bakoitzean. Lehenengo saioan, Aurrera, The fronzen road eta Mountain emango dituzte, eta bigarrenean, berriz, Where the wild things play eta Dirtbag: the legend of Fred Beckey. Euskaraz den bakarra Aurrera da, eta gainerako filmak jatorrizko hizkuntzan izango dira euskarazko azpidatziekin.
59. Pagoeta Eguna
Ekainaren 3an ospatuko dute 59. Pagoeta Eguna. 08:00etan kalejira egingo dute txistulariek, eta 08:30ean Pagoeta aldera abiatuko dira, Guria tabernaren aurretik. 11:30ean meza izango da Pagoetako gurutzearen ondoan, eta ondoren erromeria. Pagoetan biltzen direnentzat salda eta ardoa izango da doan, eta barra bat ere jarriko dute jatekoarekin eta edatekoatekin.