Urteari korrika eginez amaiera emateko, abenduaren 31rako San Silvestre lasterketa antolatu du Antoniano Kirol Elkarteak aurten ere. Urtero bezala, bi proba jokatuko dituzte: 13 urte bitarteko neska-mutilena, 17:00etan hasita, eta 14 urtetik gorakoena, 18:00etan. Biak ala biak Musika plazan hasi eta bukatuko dira; txikienek Alde Zaharrari itzulia emango dioten bitartean, helduek 4 kilometroko ibilbidea osatu beharko dute.
Izen aurrez eman daiteke Helmuga Kirolak dendan, 5 euro ordainduta,; egunean bertan 7 euro balioko du. Urtero bezala, lehen hiru sailkatuentzat egongo dira sariak, bai gizonezkoetan bai emakumezkoetan. Bestalde, sari berezia egongo da mozorro onenarentzat, eta hainbat sari zozkatuko dituzten parte hartzaileen artean.
