‘Arima basatiak’ dantza ikuskizuna eskainiko dute larunbatean, Modelon

Warda Mallal dantzari eta koreografoak hainbat ekitaldi antolatu ohi ditu urtean zehar, besteak beste, Gipuzkoako Hip-Hop Txapelketa—duela bi aste izan zen 6. txapelketa—, Zarauzko Kabareta edo ekialdeko dantzen erakustaldiak. Larunbat honetarako, inauteriekin bat eginik, Nazioarteko Fusio Dantza Jaialdia antolatu du, Arima basatiak izenburupean.

Modelo aretoan izango da, 19:30ean hasita, eta sarrerak salgai jarri dituzte. 10 euro ordaindu beharko dituzte helduek eta 8 euro, berriz, haurrek. Sarrerak eskatzeko, 637-25 68 51 telefono zenbaki deitu daiteke, o.uarda@hotmail.es helbidera idatzi edo Warda Mallalen estudioan bertara jo.

Ikuskizunaren izenburuak dioen bezala, emakumeetan oinarrituta dago ekitaldia, «emakume gerlarietan». Hain zuzen, punta-puntako dantzariek hartuko dute parte, Morganak, esaterako. «Nazioartean ezaguna da dantzari eta irakaslea eta askotariko herrialdeetan eskaini ohi ditu masterrak», dio oriotarrak. Horrez gain, Madrilgo, Bilboko, Gasteizko, Donostiako, Hernaniko, Usurbilgo eta Warda Mallalek Zarautzen duen eskolako konpainia ere izango dira Modeloko oholtza gainean. Horiek «jantzi ikusgarriekin, lamiak, piratak, sorginak... islatuko dituzte. Mallalek jakinarazi du «galduezineko hitzordua» dela, «Inauteriak ospatzeko modu paregabea».