Ibon Imazen omenezko surf txapelketa herrikoia, asteburuan

ZSEaren egoitzaren parean jokatuko dute XXI. Ibon Imazen memoriala. Aurreko urteetan bezala, hainbat mailatan lehiatuko dira surflariak: emakumezko eta gizonezkoen open mailan; emakumezko eta gizonezkoen master mailan, emakumezko eta gizonezkoen 18 urtez azpikoen mailan; 14 urtez azpikoenean; alternatibo—txapelketetan parte hartzen ez dutenak— mailan; longboard-ean; bodyboard-ean; SUPean eta Tag Team mailan. Azken hori taldeka egiten da. 

Larunbatean, 08:00etan izango da check in-a, eta arratsaldean, berriz, skate jam saio herrikoia izango da Argiñano pareko skate parkean. Bertan adin guztietako skater-ek hartu dezakete parte. Sari bereziak izango direla aurreratu dute ZSEtik, skate-ak, taulak, trajeak eta beste hainbat. Ciruelo disko-jartzaileak girotuko du.

Igandean izango da bigarren jardunaldia, eta baita sari banaketa bera ere. Astebururako baldintza egokiak iragarri dituzte, olatu "politekin".

Ostiralera arte

Imaz zenaren omenezko txapelketan parte hartu nahi dutenek ostirala izango dute azken eguna izena emateko. Horretarako, Zarauzko Surf Elkartera jo beharko da; izen ematea dela eta, arratsaldez ere zabalik egongo da egun horretan, 15:30etik 19:30era. Era berean, zse@zarauzkosurfelkartea.com helbidera ere idatzi daiteke izena emateko.

Maila bakarrean lehiatu nahi dutenek 10 euro ordaindu beharko dituzte, hortik aurrera maila bakoitzeko beste bost euro ordaindu beharko dira.