Aste honetan hasi dira lanekin Azken Portun. Auzoz auzo programaren barruan, beste hainbat auzoetan egin duten moduan, brigadak Azken Portuko kaleak, plazak eta lorategiak garbitu eta hobetuko ditu. Tentenea plazako irisgarritasun bermatzeko, arranpa eraikitzen ari dira, esaterako.
Auzoz auzo programa duela urtebete jarri zuen martxan Zarauzko Udal Gobernuak, udalerriko auzoak apurka apurka txukuntzeko, udal baliabide guztiak egun batzuetan leku zehatz batean batu eta lanean jarriz. Orain arteko jardunaren balorazio "oso positiboa" egin du Iban San Martin Obra Txikien eta Zerbitzuen zinegotziak: "Auzo bakoitzeko espazio publikoak eta bizilagunen eskaerak aztertu eta gero, hobekuntza ugari egin ditugu auzoetan". Hori dela eta, nabarmendu du agintaldi osoan jarraipena izango duela programak.
