Hasierako onespena eman diete Udal Gobernuak (EAJ eta PSE-EE) aurkeztutako 2017ko Ordenantza Fiskalei; irailaren 29ko udalbatzarrean eztabaidatu zuten gaia, eta oposizioko bi alderdiek, EH Bilduk eta Irabazi Zarautzek, aurka bozkatu zuten. Oro har, %0,7 igoko dira zergak eta tasak, eta igoera ezartzeko orduan, Jesus Arana Ogasun zinegotziak dio «uztaileko urteko azpi inflazioaren indizea» hartu dutela kontuan. Igoera ez dute tasa sozialetan ezarriko; hainbat jaitsi egingo dituzte.
Hondakinen tasan, ordea, %5eko igoera proposatu du Udal Gobernuak datorren urterako. Aranaren hitzetan: «Teknikariek, zerbitzuaren azterketa ekonomikoa egin ondoren, %26ko defizita duela ikusi dugu. 2015ko datuekin egin dugu azterketa. Gehiegizko defizita dela deritzogu, eta ondorioz, defizit hori murriztea da gure helburua».
Ondasun Higiezinen Gaineko Zergaren errekargua %100ean mantenduko dute etxebizitza hutsen kasuan. Hala ere, etxebizitza hutsak zehazteko iaz jarritako energia kontsumoaren parametroa jaitsi egin dute, 554 kilowattetik 300 kilowattera.
Bestalde, hainbat berrikuntza izango dira hobarietan. Esaterako, estreinakoz familia errenta estandarizatua hartuko dute kontuan.
Oposizioa, izoztearen alde
Irabazi Zarautzek boto partikularra aurkeztu zuen, Udal Gobernuak aurkeztutako ordenantzetan zenbait aldaketa eta ekarpen proposatuz , «fiskalitate justu eta progresibo bat lortzeko helburuarekin». Boto partikularra ez zen aurrera atera. EH Bilduren babesa izan bazuen ere, EAJk eta PSE-EEk aurka bozkatu zuten.
Oposizioko bi alderdiak udal zergak eta tasak izoztearen alde agertu ziren. Arrazoitu zutenagatik, iaz arte Zarauzko Udalean abuztuko KPIa erabili izan da tasak eta zergak eguneratzeko, eta aurtengoa 0,1ekoa izan da.
Ondasun Higiezinen Gaineko Zergan, etxebizitza hutsei %150eko errekargua txertatzearen alde agertu zen EH Bildu. Ildo beretik, Irabazi Zarautzek bi errekargu mota proposatu zituen: %150 guztiz hutsik dauden etxebizitzentzat, eta %75 gutxi erabiltzen direnentzat.
Hondakinen tasaren igoerari dagokionez, EH Bilduk iritzi dio «tasa horretan gehiago berezi behar da zerbitzua ongi erabiltzen duten herritarren eta oker erabiltzen dutenen artean». Irabazi Zarautzen ustez, hondakinen tasaren igoera horren atzean errauste plantaren azpiegitura dago.
