Akordeoi doinuak izango dira nagusi herrian, asteazken honetan hasi eta larunbata bitartean. Zarauzko XXX. Akordeoi Astea antolatu du Hauspoz Euskal Herriko Akordeoi Elkarteak, Zarauzko Udalarekin, Gipuzkoako Foru Aldundiarekin eta SGAE Fundazioarekin elkarlanean, eta urteroko ildoan ospatuko dute aurten ere.
Ohi bezala, akordeoi konposiziorako ikastaroa eskainiko dute Imanol Urbieta udal musika eskolan; aurretik matrikulatutako ikasleek hartuko dute bertan parte. Ikastaroarekin bihar hasiko dira, asteazkenarekin, eta ostiralera arte iraungo du, eta aurten Jose Manuel Lopez musikari eta irakasle madrildarrak gidatuko du. Saioak 15:00etatik 20:00etara izango dira egunero.
Datozen bi egunetan, berriz, emanaldien txanda izango da. Ostegunean, 20:00etan, Arrasateko Akordeoi Lehiaketako saridunek kontzertua emango dute Modelo aretoan. Honako hauek igoko dira oholtza gainera: Luis Arenosa eta Juan Arenosa, infantil mailan; Juan Matias, juniorretan; eta Queralt Morral, seniorretann.
Ostiralean, berriz, Phillipe de Ezkurra akodeoi-jotzaileak gidatzen duen Ezkurra Trio ariko da zuzenean; berarekin ariko dira Angel Unzu gitarrista eta Kike Arza kontabaxu-jotzailea. Emanaldia 20:00etan izango da, Musika Plazan.
Larunbatean, asteari amaiera jartzeko, Francisco Escudero Nazioarteko Akordeoi Lehiaketako sariak banatuko dituzte Modelon, 20:00etan.