Maiatzaren 15etik 17ra jokatuko da emakumeen Euskal Herriko Itzulia, eta eta lehenengo etapa Zarautzen hasi eta amaituko da. Zarautz askotan izan da Itzuliaren parte, modu batera zein bestera, eta tropela ia urtero igarotzen da herriko errepideetatik.
Gainera, aspaldiko kontua dela esan daiteke, Itzuliaren hasierako urteetakoa. Zarauzko Argazki Artxiboan ondorengo argazkia topatu du Zarauzko Gukak; izatez, Eusebio Bastidak dohaintzan emandako irudia da honakoa. Erregistratu gabe dago zein urtetakoa den, baina agerikoa da zaharra dela, duela ehun bat urtekoa. Kontuan izan behar da lehen edizioa 1924an korritu zela, eta lehen aldi hura 1930ra arte antolatu zutela; ondoren, 1935ean jokatu zuten berriz, eta 1969ra arte ez zuten berreskuratu.
Argazkiaren kontzerbasioa halamoduz dago; hondatu samar dago, zulotxoekin eta tolestura nabarmenekin. Hala ere, badu bere xarma. Getariara iritsi aurreko tunela pasata, tropela irekitzen doan motoa eta atzetik txirrindulari multzoa; kuriosoa egiten da tunela zeharkatzen ari den txirrindulari bat ageri dela, multzotik aparte.