Zarautz helburu turistiko bat den heinean, ziur gertuko nahiz urrutiko bisitariak dabiltzala herriko kaleetan Aste Santuko opor egunak aprobetxatzen. Eta ziur ez dituztela kaleak hutsik topatuko Zaharrak Berri ataleko irudian bezala. 1920 inguruko San Frantzisko kaleko argazki bertikal bat da, non apenas dagoen inor; Kale Nagusiko bidegurutzean bistaratzen diren bi lagun salbu.
Far West pasarte mortua edo pandemia garaiko oroitzapenak gogora ekar ditzaken arren, paisaia arkitektonikoak pizten du benetako arreta. Mende bat igaro ondoren ere, argazkilariak irudi hori atera zuen tokira joan eta norbere sakelako telefonoarekin erretratu bera aterako balu, originalaren kalko bat egingo luke.
Esan gabe doa eraikin horiek denak hor bertan jarraitzen dutela, eta egin den aldaketa nabarmenena, nola ez, errepidea asfaltatzea izan da. Eta, jakina, herriari bizitza ematen diote negozioak ere sortu dira inguruan denboraren joan-etorrian. Modu horretan, Zarauzko Alde Zaharrak eta San Fantzisko kaleak bere esentziari eusten diote.