Usadioari jarraiki, herritar ugari kalera aterako da otsailaren 4an, Santa Ageda bezpera ospatzeko helburuarekin. Baserritar jantziak soinean eta makilak eskuan, etxez etxe eta baserriz baserri ibiliko dira beste urte batez, bizilagunei koplarik onenak eskaintzen.
Denbora hegan doala esan ohi da, eta agian horixe pentsatuko dute une honetan artikuluko argazkiari begira daudenek. 70 urte beteko ditu aurten aipatu irudiak: Irrintzi taldeko kideak errepara daitezke bertan, eta Santa Ageda bezperako eskera irtetear daude.
Trikiti eta eskusoinurik ez zitzaien falta orduan ere, eta hotza ez zen aitzaki, inondik inora ere. Zelaiari arretaz erreparatuz gero, elurtuta dagoela ikus daiteke; hala eta guztiz ere, ia hogei laguneko taldea osatu zuten kalerik kale abesten ibiltzeko.