Badira egun zoragarriak, inoiz ilunduko ez duela diruditenak.
Badira zeru izartsuak, inoiz lainotuko ez duela diruditenak.
Badira opor ahaztezinak, inoiz lanera bueltatuko ez gaituztela diruditenak.
Badira liburu mamitsuak, inoiz bukatuko ez direla diruditenak.
Badira amets goxoak, errealitatera itzuliko ez zaituztela diruditenak.
Badira urtaro urriak, oparotasuna betiko galduko dela diruditenak
Eta.. gaua iristen,
lainoak bueltatzen,
oporrak ahitzen,
liburuak bukatzen,
ametsak desagertzen,
zuhaitzak, loreak, natura berpizten …dira.
Hori horrela, ulertezina da askotan zenbat kostatzen zaigun sinestea pertsonek aldatzea badaukatela eta benetan aldatzen direla; udazkenaren ondoren udaberria datorrela; hutsegiteekin ikasten dugula; beti dugula hobetzea; sarritan betaurrekoak aldatu baino ez dugula; pertsonaren begiradak ikaragarri lagun dezakeela.
Izan ere, badira egun zoragarriak, inoiz ilunduko ez duela diruditenak; badira pertsonak denbora txikian aurrerapauso handiak ematen dituztenak; edota, ez du axola, denbora luzean aurrerapauso txikiak ematen dituztenak.
Badira ametsak biziki betetzen direnak. Eta badira uneak, egunerokoa hobetzea daukagunak.