Urteroko zitari hutsik egin gabe, Arkamurka Natur Elkarteak Zarauzko Astronomia Astea antolatu du datorren asterako. Aurtengoa 27. edizioa izango da, eta orain arteko egitura berari eutsiko dio: bi hitzaldi eskainiko dituzte elkartearen lokalean (Santa Marina kalea 2, 2. solairua), eta gau behaketa egingo dute Torreoian.
Apirilaren 3an eta 4an izango dira solasaldiak, ostegunean eta ostiralean, biak ere 19:00etan hasita. Lehena, Iruñeko Planetarioko zuzendari eta International Planetarium Societyko administrazio kontseiluko kide Javier Armentia astrofisikariak emango du, eta Descifrando el cosmos (La astronomia como ciencia de datos) izena jarri dio.
Hasierako izar-mapetatik hasi eta petabyte informazioa prozesatzen dituzten algoritmoetaraino, datuen zientzia izan da astronomia. Aurrerapen bakoitza sakabanatutako seinaleak interpretatzeko gaitasunaren araberakoa izan da historian zehar, eta, gaur egun, JWST eta Vera Rubin behatokia bezalako teleskopioekin, sortutako datu kopurua izugarria da, baita erronkak ere. Armentiak gai horretan ardaztuko du bere saioa.
Bigarren hitzaldia, berriz, Arkamurkako kide Ander Gonzalez de Txabarrik eskainiko du. Iaz Praktika txarrak komunikazioan hitzaldia eman zuen, eta aurten ere animatu da, baina oraingoan bestelako gai bat plazaratuko du; Eguzki sistema, kaosetik egiturara, hain zuzen ere. Bi galdera nagusi erantzuten saiatuko da: bata, nolatan du eguzki sistemak arrautza frijitu egitura, eta bestea, zergatik daude eguzki sistemako objektu guztiak bananduta. Hala, galdera horien ildotik, eguzki sistemaren jaiotza eta garapena aztertuko du Gonzalez de Txabarrik.
Zerua ikuskatzeko aukera
Astronomia Astea borobiltzeko, ohi bezala, gau behaketa egingo dute larunbatean. Ilatargi Astronomia Taldea eta Arkamurka Natura Elkartearen eskutik, eta eguraldia lagun bada, Torreoira igoko dira zerua ikuskatzeko. Torreoian bertan jarri dute hitzordua, 22:00etan, eta teleskopioak eraikinaren goiko solairuan kokatuko dituzte. Antolatzaileek azalpentxo batzuk emango dituzte, eta bertaratzen direnen galderei erantzuteko gertu izango dira.
Adierazi dutenez, konstelazio nabarmenak ikusteko aukera izango da. Ilargia ilgoran egongo da, erdi bat argituta eta bestea itzaletan, eta teleskopioz behatu ahal izango dute. Marte eta Jupiter planetak ere ikusgai izango dira garai honetan; Jupiterren ilargietarik lau ikusten saiatuko dira. Baita Orion konstelazioa eta izar uxo bat edo beste ere.