Zarauzko Udalak, Mugikortasun departamentuak gidatuta, taxi zerbitzu publikoa aztertu du azken hilabeteetan. Zerbitzua hobetu daitekeela ikusita, Zarauzko Taxiaren plan berria aurkeztu dute sektorearen egoera aztertzeko. Plan honen helburua zerbitzua hobetzea da, taxilarien lan-baldintzak hobetuz eta herritarrei zerbitzu eraginkorragoa eskainiz.
"Taxia zerbitzu publiko gisa hobetzea da hiri eta herri askoren erronka nagusietako bat mugikortasunaren arloan. Egia da, halaber, gero eta zailagoa dela taxiko profesional gisa irautea, lanbide horretan esklusiboki arituz", azaldu du Iker Basurko Mugikortasun zinegotziak. "Hirietan, eta gurea bezalako herrietan, oso zaila izatea eragiten duten aldagai batzuk aipa ditzakegu: mugikortasunaren kultura aldatzea, gaur egun merkeagoak eta diruz lagunduak diren garraio publikoko beste zerbitzuen hobekuntza, share car (auto partekatua) modalitatea merkatuan sartzea, eta horri Eusko Jaurlaritzaren araudi zaharkitua gehitu beharko litzaioke (2002tik aldatu ez den araudia); izan ere, araudi horrek, besteak beste, ez du uzten aldi baterako lizentziak ematen eskaera handiko garaian, eta lizentzia duten profesionalei ere ez die uzten beste pertsona bat kontratatzen beren ibilgailuak egunean ordu gehiagotan zerbitzua ematen jarrai dezan".
Udalak taxilariekin elkarlanean garatuko du plana, eta beste erakunde batzuen babesa bilatuko du, hala nola Gipuzkoako Foru Aldundiarena, Urola Kostako Mankomunitatearena eta Eusko Jaurlaritzarena. "Plan honek hainbat eskuhartze izango ditu epe laburrera udalaren eskutik eta epe ertainea, espero dezagun, gainerako erakundeen laguntzarekin", adierazi du Basurkok.
Planak hainbat neurri jasotzen ditu, hala nola udalaren eta taxilarien arteko hitzarmena sinatzea, sektoreko profesionalen lan-baldintzak hobetzeko. Horrez gain, taxi geltokia tren-geltokiaren ingurura lekualdatzea aztertuko dute, kokapen estrategikoagoa bilatzeko. Gainera, Brigadaren eraikinaren ondoan bigarren taxi geraleku bat sortzea ere aurreikusten dute, etorkizuneko autobus geltokiarekin koordinatzeko.
Neurri ekonomikoak ere proposatu dituzte, hala nola, taxilarientzako urteko tasa kentzea eta oporraldietako nahi gaueko txandetarako zerbitzu-eguteki bat ezartzea, herritarrei beti gutxieneko zerbitzua bermatuz. Aldi berean, informazio-kanpaina bat jarriko dute martxan, planaren garapenaren berri emateko.
Udalak abian jartzeko zailagoak diren beste jarduera batzuk landuko ditu. Hori dela eta, beste erakundeen laguntza eta parte-hartzea eskatzen dute. "Erakundeen arteko lankidetzari dagokionez, laster bilduko gara Mankomunitatearekin, Urola Kostan erregimen bereziko eremu gisa lan egin ahal izateak ematen dizkigun aukerak eta potentzialak aprobetxatzeko gai izan behar baitugu", amaitu du Basurkok.