EH Bilduren babesari esker aurrera egin du Zarautz eremu tentsionatu izendatzeko mozioak

EH Bildu aspaldi ari da adierazten etxebizitzaren arazoa larria dela Zarautzen. Egoera hori iraultzeko ezinbestean neurri eraginkorrak hartu behar direla ere ari da aldarrikatzen. Horregatik, EH Bilduk bat egin du Zarautz eremu tentsionatu izendatzeko prozesua abiatzearen inguruan PSE-EEk aurkezturiko mozioarekin, eta ondorioz EH Bilduren botoei esker aurrera egin du ekimenak.

Izan ere, eremu tentsionatu izendatzeak hainbat bitarteko emango lizkioke Zarauzko Udalari alokairuen prezioak kontrolatzeko. Baita herritarren etxebizitza eskubidea bermatzeko urratsak egiteko ere. Ostegunean udalbatzarrak onartutako mozioak jasotzen dituen neurrien artean daude horietako zenbait: neurriak hartzea etxebizitza hutsak alokairuan jartzea sustatzeko, etxebizitzaren inguruko diagnostiko eguneratua eta zehatza egitea, eta diagnostikoaren emaitzen arabera Zarautz eremu tentsionatu izendatzeko eskaera bideratzea Eusko Jaurlaritzara.

EH Bilduk aspaldi eskatu zion diagnostiko zehatzago bat egitea Udal Gobernuari, legeak aipatzen dituen aldagai guztiak kontuan hartuta: metro koadroko salmenta prezioak, hipotekak eta etxebizitzaren oinarrizko gastuak (elektrizitatea, ura, gasa...). Izan ere, Zarauzko Udalak egindako etxebizitzaren azterketa azalekoa izan zen, eta Eusko Jaurlaritzaren datuak bere horretan bildu zituen txostenean, legeak ematen dituen aldagai guztiak kontuan hartu gabe.

2023ko datuen arabera, Zarauzko etxebizitza-parkearen %20 hutsik dago edo bigarren etxebizitza gisa erabiltzen da. Zehazki, 900 etxebizitza baino gehiago hutsik daude Zarautzen, eta beste 1.516 bigarren bizileku gisa erabiltzen dira. EH Bilduren iritziz, egoera horren aurrean, ezinbestekoa da Udalak neurriak hartzea. Zarautz osoa gune tentsionatu izendatzeko benetako ahalegina egitea litzateke neurri horietako bat. Izan ere, aldagai guztiak kontuan hartuta azterketa sakona eta zehatza eginez gero, argi dago Zarautzek horretarako baldintzak soberan betetzen dituela. Gainerako guztia aitzakiak dira.

Turismo Planak ez ditu herritarren kezkak eta beharrak aintzat hartzen

Zarauzko Turismo Plana ere eztabaidagai izan zen osteguneko udalbatzarrean. EH Bilduren iritziz, Turismo Planak hutsune nabarmenak ditu hasieratik. Diagnostikoaren fasean bertan, ez dira kanpinetako eta aterpetxeetako datuak jaso, eta herritarrei egindako galdeketa eskasa izan da zeharo: 38 lagunen erantzunak soilik jaso dira, eta hori ez da datuak biltzeko, ikerketa serio bat egiteko eta horretan oinarrituta plan bat garatzeko gutxienekora ere iristen. Horregatik, herritarren parte-hartzea sustatzeko beste bide batzuk proposatu zituen EH Bilduk, baina Udal Gobernuak ez zuen EH Bilduren proposamena onartu.

Bestalde, EH Bilduk udal osoko bilkuran onartu den Turismo Planaren inguruan kezka handia adierazi du. Izan ere, planak ez ditu behar bezala lantzen herriaren erronka nagusiak, galdetegia erantzun zuten herritarren %54k turismoak eragin negatiboa edo oso negatiboa duela uste duen arren.

Zarautzen turismoak goranzko joera nabarmena izan du: 2023an %8,6 hazi ziren sarrerak eta gaualdiak, pandemia aurreko datuak gaindituz. Gipuzkoan hazkunde handiena izan duen udalerria da Zarautz, eta horrek turismoaren eta turismo ereduaren inguruko hausnarketa egitea eta benetan sakontzea eskatzen du, berandu izan baino lehen. Horregatik, lau neurri zehatz proposatu ditu EH Bilduk:

• Turismoaren karga-ahalmena zorrotz aztertzea eta turismoari mugak ezartzea.
• Herritarren ongizatea lehenetsiko duen turismo eredua sustatzea, eta horretarako neurriak hartzea.
• Etxebizitza turistikoen araudia lehenbailehen garatzea, herritarren etxebizitza eskubidea bermatzeko.
• Turismoa sustatzeko publizitate gehiago ez egitea.

Turismoari dagokionez, EH Bilduk argi du Zarautzek ezin duela hazkunde mugagabea elikatu, horrek erabat hipotekatzen dituelako herria, bertako ekonomia, lan baldintzak eta bizilagunen atsedena eta ongizatea. EH Bilduk nabarmendu du etxebizitza eredua zein turismo eredua zuzenean lotuta daudela Zarautzen etorkizunarekin, eta dei egin die herritarrei hausnarketa honetan parte har dezaten eta Udal Gobernuaren norabidea zuzentzen lagun dezaten.