Indarkeria Matxistaren Kontrako Eguna da gaur, Azaroak 25. Egun seinalatua da gaurkoa berdintasunaren aldeko borrokan, nazioarteko hainbat herrialdetan. Urolako Komunikazio Taldeak (UKT) ere bat egiten du milioika herritarrek zabalduko duten aldarriarekin.
Herritar guztientzat aukera berdintasuna bermatuko duen gizarte parekide eta justuago batean sinesten du UKTk, eta horren erakusle da kooperatibako Berdintasun batzordeak 2021. urtean abian jarri zuen I. Berdintasun Plana. Aurten, gainera, berdintasunaren inguruko formakuntza jaso dute langile guztiek, eta berdintasuna lortzeko bidean gauzatu beharreko beste hainbat ekintza ere zehaztu ditu UKTk.
Gaur eskualdean izango diren ekitaldien berri emateaz gain, indarkeria matxistaren aurkako jarrera irmoa eta hori gaitzesteko betebeharra duela berretsi nahi du UKTk beste urte batez.